Fréttamynd - Íslenskir þættir

Nokkrar myndir sem Árni Stefánsson tók af ferðum og viðburðum á Íslandi á fimmta áratug síðustu aldar. Meðal annars má sjá páskaferð upp á Kjöl á Willys jeppum og myndir af sömu jeppum í fleiri torfærum. Merkilegar myndir af vélsleða á ferð á Rauðavatni í febrúar árið 1947, þar sem skíðafólk er dregið um í snjónum á ísilögðu vatninu. Vígsla björgunarstöðvar Slysavarnafélags Íslands í Örfirisey árið 1946. Lúðrasveit Reykjavíkur leikur. Sigurgeir Sigurðsson biskup Íslands blessar björgunarstöðina. Björgunarbáturinn Þorsteinn settur á flot og björgunarlínu sést skotið. Nokkrar myndir frá 100 ára afmælishátið Menntaskólans í Reykjavík árið 1946, þar sem gamlir nemendur og fleiri fagna. Að lokum má sjá hátíðarhöld  í Reykjavík á 17. júní árið 1946. Á Austurvelli leggja Sveinn Björnsson, forseti Íslands, og Ólafur Thors, forsætisráðherra, blómsveig að styttu Jóns Sigurðssonar. Á íþróttamótinu á Melavelli sést íþróttafólk leika listir sínar í fimleikum og frjálsum íþróttum, meðal annars spretthlaupi og kúluvarpi.

Miðstöð stafrænna hugvísinda og lista styrkti stafvæðingu þessa efnis með styrk úr Innviðasjóði.