Óeirðamynd Sósíalistaflokksins 30. mars 1949

Óeirðamynd sem tengd er við Sósíalistaflokkinn á Íslandi. Þann 30. mars árið 1949 lá fyrir Alþingi að greiða atkvæði um það hvort að Ísland myndi ganga í Atlantshafsbandalagið, NATO. Fylkingar mynduðust bæði meðal andstæðinga inngöngunnar sem og þeirra sem voru hlynnt henni og augljós spenna var í loftinu þennan merkilega dag. Hópur mótmælenda hélt fund við Miðbæjarskólann áður en hann hélt á Austurvöll til að mótmæla inngöngunni. Á meðan hafði hópur NATO-sinna myndað vörð utan um Alþingi til að vernda það fyrir mögulegum ágangi. Á myndunum sést hvernig sló í brýnu á milli fylkinganna og þá sérstaklega á milli mótmælenda og lögreglu þar til táragasi var beitt til að dreifa úr mannfjöldanum.
Margir kvikmyndatökumenn voru viðstaddir þennan atburð og skjalfestu hann nokkuð vel frá ólíkum sjónarhornum. Ekki er með vissu vitað hver kvikmyndatökumaður þessara mynda er en Kvikmyndasafnið fagnar öllum ábendingum varðandi það hver eða hverjir gætu hafa staðið á bakvið þessa kvikmynd. Myndin barst safninu frá Sovétríkjunum en er merkt Sósíalistaflokknum.

Kolbeinn Rastrick vann rannsókn á Kvikmyndasafni Íslands um það kvikmyndaefni sem til er af óeirðunum og er hlekkur að ritgerð hans hér á síðunni.