Reykjavík og Hveradalir

Úr kvikmyndasafni Hannesar Pálssonar. Myndefni frá höfninni í Reykjavík, Hljómskálagarðinum og fleiri stöðum í höfuðborginni. Einnig sjást skemmtileg myndskeið frá skíðasvæðinu í Hveradölum. Hannes Pálsson fæddist 9. október 1924 á Ísafirði en flutti til Reykjavíkur 1944 til að læra ljósmyndun hjá Sigurði Guðmundssyni ljósmyndara. Hannes starfaði og rak ljósmyndastofu undir eigin nafni allan sinn starfsaldur. Hann var einnig oft með ljósmyndastofur víða á landsbyggðinni, einkum á Patreksfirði og Bíldudal. Á yngri árum ferðaðist hann mikið með Farfuglum, Páli Arasyni og fleirum í allskyns óbyggðaferðum, sérstaklega á staði sem lítt hafði verið farið á áður. Myndin var tekin um miðbik 20. aldar.